#احببت_سجاني(06)

 

بعد ناس المدرسة نهوا خدمة امي بسبب نظرها اضطرينا نطلع من بيتنا المأجرنه ونشوف بيت تاني في مكان ارخص...

ولقينا البيت ...ياهو بيتنا الحالي دا... في منطقة طرفية ...منطقة اقرب للعشوائية ...والبيت عبارة عن حوش طين.. فيه اوضة واحدة مبنية بالطين و قدامها راكوبة بالحصير مع المنافع ...ما كان فيه مطبخ ..اضطرينا ختينا عدة المطبخ في الراكوبة ...البيت كان فيه حنفية موية واحدة و ما فيه كهرباء ... سيد البيت ساكن جارنا ...كنا جارين منه سلك كهرباء .. مركبين فيه وصلة نشغل بيها التلاجة والتلفزيون و نولع بيها لمبة واحدة ...

الحسنة الوحيدة في البيت بالاضافة للايجار البسيط انه سيد البيت راجل طيب شديد ..اسمه الطيب ..اسم على مسمى ..كان مقدر ظروفنا ..ولو ما ودينا ليه الايجار ما بجي يسأل منه ...مع انه هو ذاته شغال شغل بسيط في السوق ..و كنت عارفة انه زوجته ما رضيانة من معاملته الكويسة معانا ..

ومرت ايامنا وبسبب تدهور نظر امي  بقت ما بتقدر تطلع و تدخل زي زمان... وانا مسكت امور البيت ...بقيت انا البتسوق من برة ... و بينا انا و امنية بنتم شغل البيت ...و كنا معتمدين على الحقوق الادوها لامي ناس المدرسة  وكنت شايفاها ماشة في تناقص ...

بدينا نبيع في جزء من اثاث البيت حقنا و اصلا هو اكتر من الاوضة و الراكوبة الرحلنا ليهم ديل ...لكن كان عندي امل انه يوم نرجع لبيت اكبر ... بعنا اي شي بس خلينا كم سرير ودولاب و عدة المطبخ و فرن كهرباء صغير والتلاجة  والتلفزيون ... قاعدة اشغله لامي تتونس بيه...

سامية خالتي جاتنا بعد رحلنا ...اتصلت ووصفنا ليها البيت ...طبعا لما وصلت اتفاجأت من الحالة الاحنا فيها وحالة امي ...وبكت وكوركت وقالت لامي الا ترجعوا البلد ..وقالت ح تمشي تكلم اخوها يجي يشوف حالتنا ...لكن امي وقفت ليها وابت كله كله ...الحاجتين البتكون فيهم امي عنيدة وراسها قوي هم موضوع قرايتي وموضوع رجعتها البلد ...صوتها الضعيف عادة ببقى عالي وقوي... وملامحها بكسوها التصميم والعناد... 

قالت لخالتي سامية (لو كلمتي اخوك وجاء هنا انا رجوع ما برجع معاه.. وبرحل من هنا وما بتلمي فيني تاني ولا بتلقي لي اثر ...) 

خالتي حاولت معاي انا.. لكن انا ما عارفة ليه كنت واقفة مع امي ...رغم اي شي ...رغم العذاب والتعب ...هي ما قادرة تنسى لاخوها ... وانا لقيت نفسي زيها وما عايزة اكسر كلمتها و ازعلها مني ...

رغم انه خوف خالتي سامية  وانفعالها كان مبرر ...الحي الرحلنا فيه زي ما قلت طرفي و شبه عشوائي ...وفيه كل انواع البشر .. ... ودخول البيوت والسرقات عادي ليل ونهار ...

كمان زيادة لكدا زي ما قلت انا ورثت من اهل ابوي الجمال ... وخلال الفترة القعدنا فيها هنا في الحي دا اتعرضت لحاجات ما كنت بتخيلها ...خلي المشاغلات البلقاها في الشارع يوميا ...دي ما مشكلة  ...المشكلة البجوك يصلوك عديل عشان تبيعي نفسك ...ما مهم المقابل شنو ...والله حاجات مرات تضحك من تفاهتها ...

حاجة مؤسفة كانت بالنسبة لي انه الناس تفتكر انه اي بت فقيرة وما وراها راجل متاحة ليهم ...رخيصة ...يعملوا فيها الدايرنه ...تعبت شديد  وانا دايما بصد وبوقف الناس في حدهم ..

دا بالاضافة لمسئولية امي واختي الاتحملتها... خلوني حسيت نفسي في السنة الأخيرة دي كبرت كم سنة ...واتعلمت الكتير... اتعلمت انه القوي بياكل الضعيف .... انه الضعف بخلي الناس تستغلك و تاكل حقك و تدوس عليك ... عشان كدا وعشان تحافظي على نفسك لازم تظهري قوية  ... ما ينفع الضعف و الهوان  ... وانا ما عندي زول اتسند عليه غير نفسي .... وكان لازم اصمد في وجه دا كله ... 

وصمدت  ....وبقيت قوية ...صلبة ... دفنت حاجة اسمها ضعف وخوف جوة ...ودفنت معاهم اي مشاعر تانية ...بقيت زي الآلة ...وواجهت العالم دا ... 

الجامعة معظم الطلاب و الطالبات كانوا شايفنها متعة و مرح مع القراية ..انا لا.. الجامعة بالنسبة لي كانت واحدة من الوسائل عشان ارفع نفسي واسرتي من الحالة النحن فيها ..ما كان عندي فيها غير القراية ...متين اخلص محاضراتي واجي جارية البيت ...ما عندي فيها علاقات لا بنات ولا اولاد ...ما كان عندي نفس لزول ولا لصحبة ولا ونسة ولا غيره ...لو صاحبت معناها اتونس... و واعزم ...وازور الناس في بيوتهم ويزوروني ..وانا ما عندي وقت ولا قدرة لدا كله ...

واحدة بس من زميلاتي في الدفعة القدرت علي .. نهال ...اصرت شديد انها تتواصل معاي ...رغم انكماشي اصرت ...و ما قدرت اقاوم روحها الحلوة المرحة... و بقت صاحبتي الوحيدة ...صحي هي عرفت من كلامي معاها اني ظروفي صعبة... وفي السنة الاخيرة دي بقيت مسئولة عن امي واختي ..لكن احترمت رغبتي في اني ما عايزة اتكلم عن سبب الظروف دي شنو ...

انا لقيت نفسي بقبل مساعدات منها... بالذات لما كانت بتشاركني في الشيتات حقتها عشان انا ما بقدر مرات اشتري ...ولما كانت بتساعدني ابدا ما حسستني اني اقل منها ولا انها بتتصدق علي ..بالعكس مرات بتطلب مني حاجات بالمقابل عشان احس الحالة واحدة ..انا كنت فاهمة دا كله ...و قدرته فيها ... وبقيت لما احتاج لحاجة بطلب منها ..وما بحس باحساس اني مديونة ليها زي ما بحس مع غيرها ...

في السنة الاخيرة في الجامعة كان واضح لي انه القروش الباقية معانا من حقوق امي ما ح تكفي لغاية ما اتخرج و افتش شغل واتعين ...مع الايجار والاكل والشراب ودواء امي و مصاريف مدرسة امنية و جامعتي ...رغم الاقتصاد الشديد ...القروش كانت بتسلل من بين يديني بسرعة ...بقيت ما بنوم بالليل من التفكير...ووصلت لاني ما عندي طريقة غير اشوف طريقة دخل تاني ...

بقينا انا وامنية نعمل فطاير نختها عند بتاع الدكان الفي الحلة ...بقينا نشغل الفرن و التلاجة بالتناوب عشان ما نكتر صرف الكهرباء ... برضه نهال صاحبتي في الجامعة عندها قريبها عنده مكتبة او مركز خدمات للطلاب في الجامعة ...فيه تحليل بحوث و طباعة للطلاب... نهال كلمته لي بقيت اشتغل معاهم لما يكون عندي فضا ..اتعلمت منهم تحليل البيانات والطباعة ...قاعدة اطلع لي منهم بشوية قريشات لما وقتي يسمح مع القراية حقة سنة التخرج دي ...

الحاجات دي بقت تجيب لينا دخل... لكن ما على قدر كدة ...وبقينا مضغوطين شديد ......امي مع ضعف نظرها ما كانت منتبهة للحاجات دي و كنت بطمنها انه القروش لسة قاعدة ... هي بقت ما عارفة الاسعار والصرف كيف ...

ومع اقتصادي الشديد ... و البنعمل فيه انا وامنية ...وشغل الجامعة.. لما جات مواعيد دفع الايجار لقيت القروش ما كفاية.. واعتذرت لعمي الطيب واديته جزء من القروش ...واعتذرت ليه اني ح اكملها بعد شوية ...طبعا هو ما كان عنده مشكلة و كان حتى ما عايز يشيل القروش ...لكن انا اصريت عليه ...هو ذاته ما عنده شي و عنده كوم عيال جاري فيهم... ومرته صعبة ...

كان عندنا في البيت موبايلين واحد عندي وواحد عند امي في البيت ...اضطريت بعت الموبايل العندي عشان اتم لعمي الطيب حق الايجار ....كان لازم اخلي تلفون مع امي لو احتاجت لزول اثناء ما انا وامنية برة البيت ..مع ضعف نظرها دا لو اضطرت بتقدر تتصل بالتلفون...سجلت ليها تلفون خضرة جارتنا  عشان لو احتاجت تتصل عليها ...اما انا بالنسبة لي لو احتجت اتصل على امي بتصرف وبشيل من نهال تلفونها واتصل..

لما مشيت لعمي الطيب اديه باقي قروش الايجار سألني ( انتي قرايتك شنو ؟؟؟)

استغربت وقلت ليه ( بقرأ دراسات تجارية ...) 

فكر كدة لحظات وقال لي ( يعني بتعرفي المحاسبة ؟؟؟) 

قلت ليه (اي بعرفها ..جزء من قرايتي المحاسبة ...) 

سكت تاني وحسيت بيه متردد... بعدين قال لي ( عشان في واحد من التجار معانا في السوق قال داير ليه زول بعرف محاسبة يشتغل معاه..الزول الكان شغال معاه مشى ...) 

انا قلبي قام يضرب ...دا ح يكون حل لمشاكلي ..لكن ...

قلت ليه (لكن انا شغالة جامعة الايام دي ..اجازتي لسة باقي ليها كم شهر ...) 

قال لي ( هو داير زول يشتغل بالعصر لغاية المغرب كدا ..عشان كدا قلت بتنفع معاك ...) .... 

معقولة القى وظيفة كدة ؟؟؟ في اللحظات ديك ما كان هاميني المرتب كم ...وما هاميني انه ح اكون مضغوطة بين القراية و الشغل  خاصة دي اخر سنة ....وما كان هاميني انه الشغل بالعصر لغاية المغرب ... انا الاتعرضت ليه في حياتي دي خلاني ابقى قوية ... وبعرف احافظ على نفسي كويس ....

كله دا ما مهم ...المهم انه يكون في دخل ثابت... و ح اخد خبرة تساعدني لقدام بعد اتخرج ......

لكن قدامي عقبتين ..

انه التاجر يرضى انه تشتغل معاه بت... وكمان لسة طالبة ...يمكن يكون عايز زول خريج عنده خبرة ..ويمكن يكون عايز  راجل خاصة مع شغل العصر دا ...و العقبة التانية امي ...

طوالي قلت لعمي الطيب (خلاص انا ما عندي مانع ... لكن اول انت شوف الزول دا برضى يشغل طالبة ..وبعدين كمان لازم نقنع امي ...انا عارفاها ح تعارض  ...بالذات كمان شغل العصر دا ...الا تجي معاي انت غايتو تكلمها انك بتعرف الزول دا ..) 

عمي الطيب بعد داك جاء قال لي انه التاجر موافق على اني اشتغل.. مع اني لسة طالبة.. .وقتها كنت مستغربة ليه قبل يشغلني... لكن بعد اشتغلت معاه جاني احساس انه كوني بت واحد من الاسباب ...حتى من قبل ما يشوفني ...وحسة بعد عرفت حقيقته فهمت انه لما يجيب بت صغيرة ما عندها خبرة تمسك ليه الحسابات بكون كويس معاه ...عشان احتمال انها تقدر تعرف حقيقته وشغله الحقيقي بكون ضئيل...

عمي الطيب بعد داك جاء معاي البيت عشان يكلم امي ...زي ما اتوقعت امي اعترضت.... قالت لي (كيف يعني تشتغلي مع الجامعة  .؟؟؟..انتي خريجة وما بتقدري توفقي ..ما كفاية شايلة شغل البيت ومسئوليته كلها فوق راسك ؟؟؟ كمان جابت ليها شغل ؟؟؟)

قلت ليها ( يا امي انا عارفة نفسي بقدر اوفق ..وهو ذاته الشغل تدريب لي لانه نفس مجالي ..وح يديني خبرة ...امي الناس الخريجين ما لاقين شغل وقت انا لقيت فرصة زي دي ما بضيعها ..كلها كم شهر واتخرج ..)

امي ما مقتنعة قالت لي ( وذاته تشتغلي في السوق وسط الرجال كيف؟؟  و كمان للمغرب ..تجي الحتة المقطوعة دي براك كيف ؟؟؟ )

قلت ليها ( يمة المواصلات ماشة اليوم كله لغاية بالليل .. وانا راكبة مع الناس البحصل لي شنو ؟؟؟) 

عمي الطيب اتدخل قال ليها ( والله يا امال يا اختي في كم بت شغالات والله مع التجار ديل ...انا ذاتي لو ما كدا ما كنت جبت.ليها الشغلة دي ...)

غايتو امي شلناها وختيناها وفي الاخر وافقت على مضض ...

ونزلت اشتغلت مع التجاني ابو راس ...


يتبــــــــــــــــــــــــــــــــــــــــــــع